Ирмос: Ру́це распросте́р Дании́л, львов зия́ния в ро́ве затче́; о́гненную же си́лу угаси́ша, доброде́телию препоя́савшеся благоче́стия рачи́тели о́троцы, взыва́юще: «Благослови́те, вся дела́ Госпо́дня, Го́спода».

Расто́ргни согреше́ний моих плени́цы и телесе́ стремле́ния возрази́, лука́вствия же ссецы́ умышле́ния, и от та́йных ско́ро очи́сти помысло́в раба́ Твоего́, Богоро́дице, всех ве́рных предста́тельство и заступле́ние.

Горо́ Бо́жия явле́нна, несеко́ма и ту́чна, и присе́нная ча́ще, покры́й мя, Чи́стая, учаще́нием моли́тв Твоих, и се́ти изба́ви ло́вчия, и от стрел соблюди́ бесо́вских и мы́слеи́ сту́дных.

Страх ми Бо́жий зача́ти, и дух, Влады́чице, сокруше́н во утро́бе мое́й сотвори́, и роди́ти житие́ доброде́тельное и стра́шное лука́вым бесо́м, и Боже́ственнаго мя покажи́ ли́ка а́нгельска собесе́дника.

Отве́рзи ми ско́ро, две́ре живо́тная, две́ри упова́ния моего́, и наста́ви, Нескве́рная, к животу́ несконча́ему, и Ца́рства Небе́снаго раба́ Твоего́ насле́дника покажи́, Боже́ственныя же сла́вы святы́х сприча́стника.