Ирмос: Жите́йское мо́ре воздвиза́емое зря напа́стей бурею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Устне́ молча́т, язы́к немотству́ет, но се́рдце пла́менствуется, огнь сокруше́ния бо пожига́ющ внутрь опаля́ет е́, и гла́сы неизглаго́ланными, Отрокови́це, зове́т Тя.

При́зри с высоты́, Ма́ти Бо́жия, и ми́лостивно изво́ли ны́не на мое́ посеще́ние сни́ти, я́ко да узре́вый Тя, от те́ла изы́ду веселя́ся.

Святы́х а́нгел мя свяще́нным и чи́стым рука́м преда́ждь, Влады́чице, я́ко да сих крилы́ покрове́н нечести́ва не узрю́, сту́дна и мра́чна зра́ка бесо́вскаго.

Неве́стниче Бо́жий всечестны́й, Небе́снаго мя неве́стника у́мнаго сподо́би, уга́сшую мою́ и несве́тлу свещу́ возже́гши святы́м еле́ем Твоим, Всенепоро́чная.

Седален, глас шестый. Подобен:Мно́гая мно́жества:

Бесо́вскими прило́ги коле́блему, Де́во, все окая́нную мою́ ду́шу на ка́мени утверди́ Боже́ственных повеле́ний Христо́вых, да не потопи́т мене́ бу́ря грехо́вная и помышле́ний злых треволне́ние.