Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Воздохни́, душе́, и от среды́ се́рдца го́рький глас испусти́ и жа́лостный к Богома́тери: поми́луй, Чи́стая, па́че всех челове́к согреши́вша, изба́ви гее́нны и тьмы ве́чныя, и десна́го мя предста́теля сотвори́.

Трезвя́щееся ми даждь се́рдце и о́ко смы́сла бо́дренно, бдя́щее же и ча́ющее, в час, его́же не мню, во тьме нощне́й приходя́ща Бо́га. Черто́га Его́ сподо́би, Чи́стая, доброде́телей свещу́ возжже́ну стяжа́вшия.

Троичен: Держа́ва Еди́наго Богонача́лия еди́на есть, неразде́льно дели́ма и несли́тно соединя́ема: Оте́ц вина́ и исто́чник Иже от Него́ Сы́на и Ду́ха происходя́щих. Сию́ согла́сно ве́рнии песносло́вим и славосло́вим во вся ве́ки.

Помощь бу́ди, Де́во, к Тебе́ притека́ющу и ве́рою вопию́щу: поми́луй, Блага́я, и очище́ние согреше́ний пре́жде конца́ пода́ждь ми, и в час конца́ спасе́ние, и по конце́ поко́й соверше́нный.