Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

Царь Небе́сный всем у́бо хо́щет Ца́рство Его́ испо́лнити, мы же, Де́во, вожделе́ем гее́нны.

Па́че ми́ра всего́ созда́ния, согреша́ющих челове́к спасе́ния жела́ет Созда́тель всех, Богома́ти.

Христу́ пострада́вшу за ны, до́лжни есмы́ и мы я́ко ве́рнии за Него́ пострада́ти, и стра́сти душетле́нныя умертви́ти.

Чи́стая Де́во, христиа́н Предста́тельнице, вся́кия ну́жды изба́ви ны, да воспева́ем Тя во вся ве́ки.