Ирмос: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Вο всем животе́ мое́м, Чи́стая, заступа́ющи, смире́нную огрева́й и многогре́шную мою́ ду́шу, наипа́че же в год распряже́ния и отсече́ния ея́ от окая́нныя пло́ти тле́нныя и расторжи́мыя подо́бием пра́ха.

Яви́ ми тогда́, Ма́ти Бо́жия, заступле́ния Твоего́ лице́, и враго́в ли́ца мра́чная, я́ти мене́ хотя́щих и растерза́ти зверообра́зно, испо́лни безче́стия, путе́м спаса́емых, Одиги́трие, наставля́ющи мя.

Бу́ди ми во искуше́ниих предста́тельство, в день гне́ва необори́мый столп, в наве́тех еди́на Помо́щница, в беда́х заступле́ние. Иму́щи е́же мощи́, Блага́я, я́ко Вышняго Ма́ти, мо́жеши невозбра́нно, ели́ка же хо́щеши, Богоневе́стная.

Вознесе́ся, просла́вися род челове́ч и че́сти сподо́бися лу́чшия сро́дством, Отрокови́це, Твоим, и Боже́ственнаго сыноположе́ния Твои́м улучи́ хода́тайством: и́бо Бог я́ко Плотоно́сец неизрече́нно яви́ся из Тебе́, неизме́нно пребы́в в Божестве́.

Стихиры, глас осьмый. Подобны:О, пресла́внаго чудеса́:

Ра́дуйся, всесвяты́й хра́ме Царя́ Христа́; ра́дуйся, глубино́ безме́рная; ра́дуйся, высото́ неизрече́нная и а́нгелом несказа́нная; царе́й, ра́дуйся, ве́нче, и иере́ов честна́я похвало́; ра́дуйся, Всесве́тлая; ра́дуйся, Всенепоро́чная;

Ра́дуйся, ве́рных неруши́мое утвержде́ние и сто́лпе незы́блемый.

Ра́дуйся, многовожделе́нное и́мя; ра́дуйся, киво́те златы́й; ра́дуйся, пла́ча отъя́тие и ра́дости воста́ние, Всепе́тая Богоро́дице; слез на́ших, ра́дуйся, избавле́ние; весе́лия, ра́дуйся, вхо́де; ра́дуйся, Неискусому́жная Ма́ти Безневе́стная, прибе́жище и заступле́ние всех к Тебе́ прибега́ющих.

Ра́дуйся, всеми́рная похвале́; ра́дуйся све́щниче всезлаты́й, ясне́йший и светоза́рный; ра́дуйся, Боже́ственный мо́сте, к животу́ преводя́й грехми́ умерщвле́нныя и ко страсте́й попо́лзшияся; ра́дуйся, Нескве́рная Де́во; ра́дуйся, исто́чниче, ток жи́зни неистоща́емый источи́вый; ра́дуйся, Всечу́дная.

Плоть прие́м от крове́й Твоих Преве́чный Бог, Тя, Нескве́рная, Предста́тельницу пока́за челове́ков. Те́мже изба́ви рабы́ Твоя́ от вся́кия ну́жды и обстоя́ния и се́тей борца́, и све́та избра́нных причасти́тися сподо́би вся сла́вящия и покланя́ющияся Тебе́.