Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Мертв от всех до́брых сый вся́цем о́бразом и неключи́м, во еди́ных де́лех тлетво́рных живы́й не стыжду́ся и веселя́йся. О, ка́ко не срамля́юся аз души́ моея́ досто́инства!

Вся́кия у́бо за́поведи уклони́хся, низведе́н же бых ле́ностию к про́пастем зло́бы горча́йшим со тща́нием, но обрати́ мя, Влады́чице.

Суха́ земля́ быв и Ду́ха плодо́в безпло́дна, лю́те олядене́вый и бу́дущаго огня́ вещество́ прозяба́яй; но Ты, Отрокови́це, мя обрати́.

Се все зол мо́ре мене́ обы́де и ре́ки страсте́й воздвиго́ша гла́сы своя́, Нескве́рная; о́ных же се́ти изми́ мя и безчи́нна стремле́ния.

Седален, глас осьмый. Подобен:Прему́дрость и Сло́во:

Све́тлый о́блак Тя и слове́сен, ро́су Боже́ственную и та́инственную, во́ду в жизнь ве́чную изменя́ему, и спасе́ния ту́чу дождя́щу уве́девый аз, прошу́ Твоей благосты́ни: даждь главе́ мое́й струю́ умиле́ния и исто́чник, я́ко пото́ки сле́зы точа́щ, да свы́ше омы́ет от скве́рны грехо́в мя и сне́га яви́т беле́йша; на Тя бо наде́юся, неключи́мый моле́бник Твой.