Ирмос: Еди́не ве́дый челове́ческаго существа́ не́мощь и ми́лостивно в не́ вообра́жся, препоя́ши мя с высоты́ си́лою, е́же вопи́ти Тебе́: Свят одушевле́нный Храм неизрече́нныя сла́вы Твоея́, Человеколю́бче.

Яко дре́вле Еву обре́т, змий мя прельсти́ и сла́сти вкуше́нием изри́ну рая́ богоразу́мия. Яже Христа́ ро́ждшая, Ада́ма втора́го, к животу́ мя возведи, Влады́чице.

Вознеду́говав Ка́иновым злополу́чно, Де́во, безу́мием, я́ко бра́та ум мой уби́х, любосла́стия меч употреби́вый и позави́девый зле́йше сего́ восхо́ду, но Ты я́ко человеколю́бива спаси́ мя.

Воспла́кася дре́вле Ада́м, Еде́ма изселя́емь, херуви́му вход его́ загражда́ющу; отпады́и́ же аз богоразу́мия, рыда́я молю́ Ти ся: со святы́ми моли́, Богома́ти, страсте́й ми изба́витися.

Поуче́ние сме́ртное, душе́ окая́нная, да предваря́ет тя в жития́ дея́ниих вы́ну, и плач восприими́, и се́тование соста́ви, Хода́таицу иму́щи чи́сту и непоро́чну ко Христу́, от Сея́ прозя́бшему.