Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твоих исте́кшею кро́вию.

Обрати мое́ в ра́дость се́тование, Всепе́тая, и неду́гов мглу и страсте́й треволне́ние всех в тишину́ и соверше́нное здра́вие преложи́.

Уще́дри, я́ко Ми́лостивая, мя нечи́стаго, Чисте́йшая су́щи сия́ний со́лнечных, и све́та се́рдце мое́ Боже́ственнаго Твоего́ испо́лни.

Ма́нии просвети́тельными, Де́во, помраче́ннаго окая́нне к све́ту путево́ждствуи́ невече́рнему Сы́на Твоего́, и свети́льник души́ моея́ уга́сшии́ возжзи́.

Еди́ну честне́йшу позна́хом Тя, Всенепоро́чная, херуви́м, я́ко ро́ждшую све́та Прави́теля, Богороди́тельнице, Его́же моли́ к све́ту мя всели́ти незаходи́мому.

Седален, глас четвертый. Подобен:Вознесы́йся:

Доброде́тели и покая́ния стезю́ приско́рбну, у́зку и о́стру ве́село пу́тствовати мя, Чи́стая, укрепи́; разшири́ в ско́рби те́сное мое́ се́рдце, ду́шу обогати́ мою́ де́лы благи́ми, и от страсте́й стро́потства на широту́ безстра́стия изведи́.