Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́; вся бо твори́ши, Христе́, то́кмо е́же хоте́ти, Тя превозно́сим во вся ве́ки.

Огнено́сну свещу́ и златоза́рну, светоно́сный черто́г и порфироблиста́ющ, ста́мну сла́дости и Хле́ба живо́тнаго трапе́зу позна́хом Тя, Отрокови́це Преблагослове́нная.

Тя всечестну́ю го́ру и превысо́кую и́же во глубину́ прегреше́ний впа́дшии, Влады́чице Чи́стая, мо́лим: к дея́нием Боже́ственным возвы́си доброде́телей возноше́ния[78].

Изба́влени пре́жния кля́твы рождество́м Твоим, Де́во Богороди́тельнице, Гаврии́лов глас Тебе́ воспева́ем: ра́дуйся, вина́ всех спасе́ния.

Яже Грозд ро́ждшая невозде́лан, плодоно́сна мя покажи́ дея́ний благи́х, и Небе́снаго Ца́рствия сподо́би, да Тя сла́влю, Чи́стая, во ве́ки.