Ирмос: Впещь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Всесвяты́й киво́т, пречестну́ю ски́нию Боже́ственную, ста́мну, све́щник, скрижа́ль, светоно́сный храм, престо́л Бо́жий сла́вный, Чи́стую Де́ву воспои́м согла́сно.

«Се роди́ся от Тебе́, Чистая», Иса́ия я́сно вопие́т, «Сын Вышняго», и Твой Сын зри́тся, Де́во, сы́ны содева́яй Небе́снаго Отца́ Тя воспева́ющия.

Не преста́й, Богоневе́сто, Сы́на Твоего́ приле́жно моли́ти за кла́няющияся и ве́рою воспева́ющия благода́ть Твою, еди́на Всесвята́я, Преблагослове́нная.

Весь помрачи́хся умо́м, весь де́моном порабо́тихся сту́дным, но к Твоему́ прибега́ю покро́ву держа́вному, Де́во, и вопию́: спаси́ мя Твоим хода́тайством, Обра́дованная.