Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас пою́щих Тя.

Яко друга́го мя пу́тника, жите́йское по́прище ше́ствующа, разбо́йницы е́мше, ду́шу мою́ уязви́ша, но Ты, Бого́мати, ту́ю воззови́.

Порабо́тив души́ самовла́стное, ура́нен бых страстьми́, не поревнова́вый Ио́сифови, но свободи́, Богома́ти, сих влады́чества.

Тобо́ю на стра́сти дерза́я, Влады́чице, вели́ку и неруши́му сте́ну ме́дяну преидо́х, и изба́вихся лю́таго искуше́ния де́монска.

Ка́пли слез ми изсхо́ша, Де́во, сном отягче́ну, но бо́дрство да́руй, слез исто́чник, и стоя́ние всено́щное.