Ирмос: Обы́де нас после́дняя бе́здна, несть избавля́яй, вмени́хомся я́ко о́вцы заколе́ния, спаси́ лю́ди Твоя́, Бо́же наш; Ты бо кре́пость немощству́ющих и исправле́ние.

Те́ло оскверни́х дея́ньми, ум помышле́ньми, чу́вства осяза́нием сласте́й, и́хже ми цельбу́ пода́ждь ка́плями слез моих, Богоблагода́тная.

Вре́мя живота́ моего́ во сне и осла́бе ижди́х, в услажде́нии и паре́нии помысло́в. Ны́не у́бо поне́ в ста́рости уцелому́дри мя, Ма́ти Бо́жия, и к покая́нию руково́дствуй.

Умы́сливый пре́жде зако́на бы́вших ухищре́ние, безу́мно поиска́х, а́ки предсто́лпия, дела́ сту́дная друг дру́гу сочта́ти; Ты же, Чи́стая, Боже́ственным мя вразуми́ Ду́хом.

Сеть воистинну скры́та ми, Всепе́тая, го́рдии и у́жами грехо́в си́ло[14]нога́м моим простира́ху, и́хже, Блага́я, я́ко тка́ние паучи́но расто́ргни.

Седален, глас первый. Подобен:Лик а́нгельскии́:

Упова́ние христиа́н нело́жное и изве́стное, ми́лости Пода́тельнице, состра́стия исто́чниче, ключу́, отверза́яй Бо́жию благосты́ню, всем отве́рзи благоутро́бия дверь, всем да́руи́ сла́дости ра́йския вход, Влады́чице.