Ирмос:«Услы́шах, Го́споди, слух Твой и убоя́хся, разуме́в дела́ Твоя́», проро́к глаго́лаше, «и просла́вих си́лу Твою́».

Мысленныя, я́коже исполи́ни, стра́сти трие́ на бе́гство мя устроя́ют: уны́ние, забве́ние и неве́жство. Но Ты, Богоневе́сто, Помо́щнице моя́, сих низложи́.

Дмя́щимся мудрова́нием и превознося́щимся смы́слом сконча́х житие́ мое́, но Ты смире́ние ми, Богороди́тельнице, пода́ждь и спаси́ мя.

Оскверни́выйся окаля́х блуда́ми ду́шу мою́, де́монов пребыва́лище быв, окая́нный: Пречи́стая Ма́ти, очи́сти.

Всесвята́я Богоневе́сто, утеше́ние оскорбля́емых, челове́ков прибе́жище, утвержде́ние ве́рных, спаси́ мя, раба́ Твоего́, молю́ся.