Ирмос: Взако́не се́ни и писа́ний о́браз ви́дим, ве́рнии: всяк му́жескии́ пол, ложесна́ разверза́я, свят Бо́гу; тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Се заступле́ние мое́, се спасе́ние, се предста́тельство души́ моея́ и весе́лие, се прибе́жище, се покров мой яве еси и надежда известная, Де́во Влады́чице.

Красну́ душе́ю и те́лом, красну́ и умо́м обреты́й Тя Кра́сный, от ложе́сн Твоих де́вственных воплоти́ся я́коже весть, безобра́зие мое́, Чи́стая, украси́в я́ко Бог, Его́же моли́ спасти́ся ми.

Но́ваго Младе́нца на объя́тиих нося́щи Твоих Безнача́льна, я́ко ши́ршая су́щи небе́с и твари́ всея́ святе́йшая, Де́во, Сего́ моли́ свободи́ти мя, Чи́стая, прегреше́ний безме́рных.

Ты мою́ жизнь окорми́ и ра́дости се́рдце испо́лни, Ты разреши́ воздыха́ний безме́рных

боле́зни, и всю го́речь души́ моея́, Всесвята́я, на и́стинное весе́лие премени́.

Стихиры, глас третий. Подобны:Ве́лия Креста́ Твоего́:

Ра́дуйся, Пресвята́я, Сло́во Свято́е Вы́шняго прии́мшая во чре́ве Твое́м; ра́дуйся, правосла́вных сла́во честна́я; ра́дуйся, невеще́ственных а́нгел благоле́пие; ра́дуйся, Богоневе́сто, всех прибе́жище.

Ра́дуйся, многолюбе́зная добро́то всея́ вселе́нныя, Богоотрокови́це Мари́е; ра́дуйся, Боже́ственное утеше́ние оскорбля́емых; ра́дуйся, немощству́ющих, Чи́стая, посеще́ние; ра́дуйся, огнезра́чное Госпо́дне седа́лище.

Ра́дуйся, сто́лпе де́вства незы́блен; ра́дуйся, Всеблагоде́тельнице песносло́вящих; ра́дуйся, златоза́рная пала́то Царе́ва; ра́дуйся, ми́ре ве́лий в ма́лем, Всечи́стая; ра́дуйся, спасе́ния на́шего глави́зно.

Ты еди́но еси́ предста́тельство непостыдное, похвала́ же и сла́ва христиа́н; Ты мя боле́зней свободи́, и напа́стей о́блаки, Де́во, обрати́ в утеше́ния свет.