Ирмос: Иса́йе, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Бо́га, Его́же родила́ еси́ неизрече́нно, Влады́чице Чи́стая, моли́ приле́жно изба́вити ны напа́стей, скорбе́й и бу́дущаго суди́лища стра́шна, и све́тлости сподо́би святы́х Его́.

Исцеле́ний бе́здну и благода́тей пучи́ну, Нескве́рная, позна́хом Тя гре́шнии, те́мже мо́лим: лю́тых всех изми́ велича́ющия и чту́щия Тя, Всепе́тая.

Мно́жества ра́ди боле́зней се́рдце мое́ рыда́ющее, утеше́ние ми и прибе́жище, ско́ро уте́ши, я́ко да и аз ве́село вопию́: возвесели́ша Твоя́ утеше́ния ду́шу мою́, Многопе́тая.

Со́нен и неради́в лени́вый аз: в де́лех мра́чных живо́т скончава́я, Влады́чице, весь потреби́х; дости́гнув же в захожде́ние жития́, восхо́д молю Тя всесветлый ми озарити.

Стихиры, глас пятый. Подобны:Ра́дуйся, по́стников:

Ра́дуйся, Агнца Бо́жия неопи́санно во чре́ве носи́вшая, пре́жния рабо́ты изба́вльшаго челове́ки, еди́на Чи́стая, ра́дость ми́рови возсия́вшая, черто́же светоно́сный неизрече́ннаго уневе́щения. Ра́дуйся, вся та́инственно озаря́ющая и просвеща́ющая, я́ко Свет облиста́вшая, Всечи́стая, непристу́пный, Безневе́стная Влады́чице. Ра́дуйся, Свята́я святы́х; ра́дуйся, всеми́рная похвало́; Бо́га, ра́дуйся, Ма́ти, подаю́щаго ми́ру ве́лию ми́лость.

Ра́дуйся, всеси́льная челове́ков наде́ждо и покро́ве, неруши́мое утвержде́ние и стено́, спасе́ние и прибе́жище неразо́рно, Бо́га челове́ком примири́вшая, Чи́стая, в безсе́меннем и пресла́внем зача́тии Твое́м. Ра́дуйся, же́зле Ааро́нов, прозя́бнувый Цвет честны́й, пи́щу тва́ри; ра́дуйся, державо непобедимая цареи́, Богоневе́сто; ра́дуйся, кре́посте му́чеников; ра́дуйся, Све́та жили́ще; Бо́га, ра́дуйся, Ма́ти, подаю́щаго ми́рови ве́лию ми́лость.

Ра́дуйся, невмести́маго Бо́га стране́ и земле́ свята́я, ю́же Ио́иль прови́де, на ню́же на́йде всех Содержи́тель; ра́дуйся, Боже́ственная стене́; ра́дуйся, Непоро́чная, упова́ние непосты́дное и тве́рдое заступле́ние сла́вящих, пою́щих, Всепе́тая, и взыска́ющих Тя вседу́шно, Богоне ве́сто; ра́дуйся, Насади́теля Ро́ждшая чистоты́; ра́дуйся, богопи́санный сви́тче; ра́дуйся, исто́чниче освяще́ния; Бо́га, ра́дуйся, Ма́ти, подаю́щаго ми́рови ве́лию ми́лость.

Испо́лни весе́лия, Чи́стая, благохва́лящия Тя и любо́вию сла́вящия, и потщи́ся свободи́ти от обдержа́щих лю́тых, напа́стей, рыда́ний и озлобле́ний, от враго́в го́рдых и скверноуби́йц, отведе́ния же темни́чна и терза́ния, туги́ го́рькия и лю́таго осужде́ния. Уще́дри ны бе́дствующия, и не оста́ви до конца́, но обы́чно поми́луй, враги́ же, Де́во, борю́щия ны, вско́ре погуби́.