Ирмос: Но́вое чу́до и боголе́пное: деви́ческую бо дверь затворе́нную Я́ве прохо́дит Госпо́дь, наг во вхо́де, и Плотоно́сец яви́ся во исхо́де Бог, и пребыва́ет дверь затворе́на. Сию́ неизрече́нно я́ко Богома́терь велича́ем.

Храм разуме́юще Тя вмести́телен Бо́га всех и Творца́, Пресвята́я Влады́чице, «ра́дуйся» Ти любо́вию вопие́м вси раби́ Твой; ра́дуйся, Прему́дрости Бо́жия прия́телище; ра́дуйся, ве́рных к Бо́гу спасе́ние непосты́дное.

Кро́ве Боже́ственный, ра́дуйся, челове́ков и всех небе́сных чино́в; ра́дуйся, апо́столов похвало́ и сла́во му́чеников; ра́дуйся, страстоте́рпцев де́рзосте неизрече́нная; всех преподо́бных и пра́ведных, ра́дуйся, све́тлое и многослову́щее удобре́ние.

Ты мне пла́мень угаси́ лю́тых, бу́рю укроти́, Чи́стая, и печа́ль утоли́, сле́зы ути́ши, напа́сти дале́че от мене́ изгони́, ра́дость пода́ждь рабу́ Твоему́, да непреста́нно я́ко благоде́ющую величаю Тя.

Богороди́тельнице Нескве́рная, всех прибега́ющих к Тебе́ покро́ве и кре́пкое заступле́ние, приими́ ны́не проше́ния раб Твоих, и скверноуби́йственных рук изба́ви, Блага́я, я́ко необори́му иму́щи держа́ву, да в песнопе́ниих Тя непреста́нно велича́ем.

Стихиры, глас третий. Подобны:Стра́стию Твое́ю, Христе́:

Ра́дуйся, колесни́це све́тлая Влады́ки тва́ри; ра́дуйся, те́плое челове́ков очище́ние; ра́дуйся, Неискусобра́чная; ра́дуйся, Всенепоро́чная, Бо́га челове́ком соедини́вшая.

Ра́дуйся, стра́ннаго и ужа́снаго та́инства явле́ние; ра́дуйся, Еюже отве́рзеся раи́; ра́дуйся, Боже́ственная трапе́зо; ра́дуйся, тле́нное пресла́вно Обезтли́вшая.

Ра́дуйся, сокро́вище ми́рови и попече́ние убо́гих; ра́дуйся, злополу́чных утвержде́ние;

ра́дуйся, исправле́ние па́дших; ра́дуйся, немощству́ющим вспоможе́ние и цельбо́.

Мно́гих грехо́в помышля́я моих пучи́ну, к Твое́й, Нескве́рная, прибега́ю по́мощи, окая́нный: спаси́ мя, Чи́стая, и го́рьких изба́ви мук.