Ирмос: Но́вое чу́до и боголе́пное: деви́ческую бо дверь затворе́нную Я́ве прохо́дит Госпо́дь, наг во вхо́де, и Плотоно́сец яви́ся во исхо́де Бог, и пребыва́ет дверь затворе́на. Сию́ неизрече́нно я́ко Богома́терь велича́ем.

Вод Боже́ственных разуме́ний Твоих присножа́ждущую мою́, Де́во, испо́лни ду́шу, к любви́ направля́ющи, Чи́стая, Сы́на Твоего́ и сию́ избавля́ющи от наве́та враго́в ви́димых же и неви́димых, ма́нием бо еди́ным Твоим неврежде́н соблюду́ся.

Всех Творе́ц и Зижди́тель, привита́вый неизрече́нно в Тебе́, Де́во Нескве́рная, существо́ челове́чо очи́стил есть пра́отчия и дре́вния кля́твы, те́мже и мя изба́ви от бед, ма́нием бо еди́ным Твоим неврежде́н соблюду́ся.

Свы́ше от лю́тых спаса́вши и озлобле́ния держа́вною, Де́во, руко́ю, вся ве́рно пою́щия Боже́ственое Твое́ рождество́ и сла́ву, ю́же стяжа́ла еси́ от всех Бо́га; те́мже изба́ви от бед и мене́ пою́ща, ма́нием бо еди́ным Твоим неврежде́н соблюду́ся.

Лю́дие христоиме́ннии моле́бно припа́дают, Чи́стая, к ми́лости Твое́й и по́мощь Твою́ ны́не призыва́ют, па́губныя боле́зни и лю́тыя ско́ро изба́витися, гла́да же и сопроти́вных нахо́да; ма́нием бо еди́ным Твоим неврежде́ни да соблюду́тся.

Стихиры, глас третий. Подобны:Ве́лия Креста́ Твоего́ си́ла:

«Ра́дуйся» Тебе́ вси взыва́ем, Мари́е Богороди́тельнице; ра́дуйся, хра́ме Госпо́день; ра́дуйся, Свет неизглаго́ланно облиста́вшая, просвети́вый су́щия во тьме льсти́внеи́; ра́дуйся, Обра́дованная Вла́дычице.

Ра́дуйся, страда́льцев светле́йший ве́нче, Чи́стая Ма́ти Де́во; ра́дуйся, Госпо́день престо́ле; ра́дуйся, Всечестна́я, Препросла́вленная; ра́дуйся, сень зако́нну уста́вльшая, я́ко ро́ждшая Жизнода́вца.

Ра́дуйся, Чи́стая, Со́лнце вве́дшая и́же во тьме лежа́щим; ра́дуйся, стено́ и покро́ве от се́рдца к Тебе притека́ющим; ра́дуйся, дев Боже́ственное украше́ние и правосла́вных всех предста́тельство.

Бед пучи́ною ны́не коле́блема раба́ Твоего́ и напа́стей мно́жеством, Де́во, уще́дри и спаси́, щедро́т поро́ждшая пучи́ну безме́рну, Отрокови́це.