Ирмос: Яко ви́де Иса́ия обра́зно на престо́ле превознесена Бо́га, от а́нгел сла́вы дориноси́ма, «О, окая́нный», вопия́ше, «а́з, прови́дех бо воплоща́ема Бога, Све́та Невече́рня и ми́ром влады́чествующая».

Лука́вно мя гладото́ю[37]сласте́й преле́стник у́дою восхи́ти и я́ко ры́бу безгла́сну мре́жею привлече́, но имы́й Тебе́ огражде́ние, Чи́стая, се́тей и тене́т его́ вско́ре изми́, раб Твой молю́ся.

Ве́лий в кре́пости Бог и ми́лостию бога́т, Нескве́рная, Иже милосе́рдия ра́ди плоть прие́мый, зове́т: «Пока́йтеся и небе́сный живо́т насле́дите», аз же жите́йским сласте́м примеша́юся».

Совокупи́ся а́нгелом естество́ челове́че, Блага́я, в Тебе́, сего́ ра́ди челове́цы жи́тельству соревну́ют а́нгельску, в де́встве и свя́тости живу́ще на земли́, и́хже ча́сти сподо́би мя, Влады́чице.

Немощно́е Ты ве́си пло́ти моея́ и души́ печа́ль, ума́ же моего́, Де́во, гнило́е и нестоя́нное; ми́лости ра́ди сподоби́ благода́ти Твоея́, да Тя сла́влю, покро́вом Твоим спаса́емь.