Ирмос: Па́че естества́ Ма́терь и по естеству́ Де́ву, еди́ну в жена́х благослове́нную, пе́сньми ве́рнии Богоро́дицу велича́ем.

Отскочи́вый я́ко жребя́ от за́поведеи́ Влады́чних, уздо́ю моле́ний Твоих да возвлачу́ся, Пречи́стая, к путе́м состоя́ния тщали́вейша.

Рыда́ю зело́, низполза́яйся безсове́тно к дело́м лука́вным греха́; изба́ви мя, Богоро́дице, о́браза го́ршаго.

Исцеле́ние пре́жде я́вльшися существа́ челове́ча, исцеля́ла еси́ сокруше́ние Ада́мле и Евино; исцели́ и мене́, Богоро́дице, Твоими моли́твами.

Целому́др ум пода́ждь ми и се́рдце чи́сто, и нрав внима́телен, да соблюда́ю, Влады́чице, честны́я за́поведи Бо́га на́шего.

Стихиры, глас седьмый. Подобны:Не ктому́ возбраня́еми есмы́:

Ра́дуйся, Бо́га неизрече́нно поро́ждшая, обожи́вшаго сня́тием Своим челове́ка, Отрокови́це.

Ра́дуйся, ми́ра всего́ сла́вное прибе́жище, а́нгел же и челове́к наро́читое слы́шание.

Ра́дуйся, Матероде́во Благослове́нная, Свет ми́рови па́че смы́сла и словесе́ пло́тию ро́ждшая.

Яко по́мощи ины́я ра́зве Тебе́ не и́мам, моли́твенник Твой, к Тебе́ припа́даю, Богородительнице: ту́не спаси́ мя.