Ирмос: Якоже дре́вле благочести́выя три о́троки ороси́л еси́ в пла́мени халде́йстем, све́тлым Божества́ огне́м и нас озари́, «Благослове́н еси́», взыва́ющия, «Бо́же оте́ц на́ших».

Прозябла́ еси́ Клас во чре́ве Боже́ствен всеи́стинно, Влады́чице Чи́стая, и Сего́ родила́ еси́ всех челове́к во спасе́ние, вся́кую ду́шу благода́ти Его́ исполня́юща и спаса́юща.

От ти́ны страсте́й, из глубины́ скорбе́й и напа́стей жите́йских возвлецы́ ны к безстра́стию, Чи́стая, и к ра́достному весе́лию, «Благослове́н», вопиющия, «Плод чре́ва Твоего́».

Удо́лий мирски́х, я́ко крин, посреде́ и те́рний житейских, и яко багряноша́рныи ши́пок[39]благоуха́нен же и цвету́щ Бог обреты́й, всели́ся в Тя Я́ве и нас облагоуха́л есть, Всенепоро́чная.

Иже дверь Тя та́инственную предположи́вый Себе́ и приста́вивый стра́нно над су́щими на земли́, Тобо́ю, Нескве́рная, челове́ком дверь подаде́, в жизнь вводя́щу вся ве́чную, я́ко щедро́т и всех Бог.