Ирмос: Росода́тельну у́бо пещь соде́ла Ангел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: «Благослове́н еси́», Бо́же оте́ц на́ших.

Превы́шши была́ еси́, Всенепоро́чная, у́мных сил: на Него́же о́ныя не дерза́ют отню́д взира́ти, Того́ на объя́тиих носи́ла еси́ Твоих, сего́ ра́ди благода́рственными гла́сы Тя сла́вим.

Боже́ственнаго Угля честно́е кади́ло, мир облагоуха́вшее, от злосмра́дия нечи́стых мя, Де́во, изба́ви страсте́й, и сла́дце даждь воспева́ти: благослове́н еси́, Бо́же оте́ц на́ших.

Сотре́на мя безме́рными преступле́нии Боже́ственным хода́тайством Твоим новосотвори́, ду́шу мою́ врачу́ющи и сло́во подаю́щи вопи́ти: благослове́нна Бо́га пло́тию Ро́ждшая.

Хра́мы Ду́ха Бо́жия нас, всесвяты́й хра́ме, сотвори́, Тя почита́ющия в Боже́ственнем сем хра́ме Твое́м и благогове́йно пою́щия: благослове́н еси́, Бо́же оте́ц на́ших.