Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, «Бо́гу побе́дную песнь пои́м» вопия́ше.

Влады́чице, плач приими́ от скве́рнаго се́рдца, Всенепоро́чная, и окая́нных усте́н, и от ти́ны омы́й мя страсте́й и прегреше́ний лю́тых, да сла́влю Тя.

Ту́чи слез пода́ждь ми Твоими мольба́ми, Всесвята́я Влады́чице, я́ко да пла́чуся те́пле и́хже согреши́х на земли́, и изба́влюся жду́щия мя му́ки.

Воздохни́, воспла́чи, душе́ моя́, и себе́ отсю́ду возсе́туи́, вопию́щи Христу́: Твоея́ Ма́тере, Ще́дре, проше́ньми, стра́шныя гее́нны изба́ви мя пови́нна.

Моего́ рыда́ния не отри́ни, Яже ми́лости Исто́чник ро́ждшая, но ми́лостивно, Блага́я, благоутро́бным Твоим о́ком, души́ моея́, Богоро́дице, стра́сти исцели́.