Ирмос: Возопи́х всем се́рдцем моим к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.

Радуйся, источниче присноживотныя воды́; ра́дуйся, све́тлый о́блаче; ра́дуйся, Боже́ственный покро́ве ве́рою Тя чту́щих; ра́дуйся, честно́е пе́ние безпло́тных.

Ра́дуйся, све́тлое благода́ти позна́ние; ра́дуйся, раю́ сла́дости; ра́дуйся, Ро́ждшая Бо́га воплоще́нна; ра́дуйся, спасе́ния на́шего Хода́таице.

Радуйся, всего мира искупление; ра́дуйся, челове́ков к Бо́гу дерзнове́ние; ра́дуйся, всезлато́е прия́телище Вы́шняго, Де́во Богороди́тельнице.

Во искуше́ниих вем Тя предста́тельство, в неду́зех Цели́тельницу, в треволне́ниих ти́хое приста́нище, в ско́рбех же ра́дость и весе́лие.

Седален, глас шестый.Самогла́сен

Нача́ло спасе́ния Гаврии́лово провеща́ние к Де́ве бысть; слы́ша бо е́же «ра́дуйся», не отбеже́ целова́ния, не усумне́ся я́ко Са́рра в се́ни, но си́це глаго́лаше: «Се Раба́ Госпо́дня, бу́ди Мне по глаго́лу твоему́».