Ирмос: Жите́йское мо́ре воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Ток слез моих мал и нище́тен прие́мши, Влады́чице, я́ко ми́ро избра́нно, благоуха́нно, чи́сто, вку́пе и фимиа́м, злосмра́днаго изми́ мя страсте́й стремле́ния.

Повину́хся страсте́м, удали́хся Бо́га блу́дно всеокая́нный, Его́же умоли́ спасти́ мя, Блага́я; к Тебе́ бо прибего́х, и ри́зами, и́миже пре́жде, мя уясни́.

Яко святы́х а́нгел Тя благоле́пие воспева́ю и молю́ся, Всенепоро́чная: неле́пая отжени́ от мене́ де́монская мечта́ния, в тишине́ соблюда́ющи се́рдце мое́.

Да не волна́ покры́ет мя, не потопи́т бу́ря, не потреби́т пучи́на, да не погрузи́т мо́ре

и глубина́ горькаго неча́яния па́губы сла́ныя, Всесвята́я.

Седален, глас шестый. Подобен:Упова́ние ми́ра:

От се́рдца и утро́б стена́ния Ти приношу́, Твоего́ прося́ благоприе́мна предста́тельства: поми́луй всеокая́нную мою ду́шу, уми́лостиви многоблагоутро́бнаго Бо́га изба́вити мя суда́ и е́зера о́гненна, еди́на Благослове́нная.