Ирмос: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Иере́и честни́и во о́бразех предпропове́даша и проро́цы прия́телище хотя́щую бы́ти, Богоневе́сто, Тя Бо́жие; Тобо́ю бо ви́деша су́щии во тьме свет Боже́ственнаго ра́зума.

Тя Нескве́рную Де́ву от естества́ челове́ча прия́т я́ко нача́ток Святы́й Госпо́дь, и на́ше все естество́ освяти́, и возсия́ свет Боже́ственнаго ра́зума.

Проше́ния Тя ве́рно прося́щих, Всепе́тая, ми́лостивно приими́, и ум наш просвета, и зако́ну Госпо́дню наста́ви вся, и озари́ свет Боже́ственнаго ра́зума.

По́мощь всех еси́, Всенепоро́чная, и́же к Тебе́ дерза́ющих и песносло́вящих Боже́ственное Твое́ рождество́ ве́рою и любо́вию, и́мже возсия́ с небесе́ свет Боже́ственнаго ра́зума.