Ирмос: Бо́жия снизхожде́ния огнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: «Благослове́н еси́, Бо́же оте́ц на́ших».

Ны́не вся испо́лнишася све́та Боже́ственнаго Тобо́ю, Всечи́стая, Ты бо дверь яви́лася еси́, е́юже ми́рови Бог приобщи́ся, просвеща́яй ве́рою зову́щия: благослове́н Бог оте́ц на́ших.

Зачала́ еси́, Нескве́рная, Иже над все́ми Бо́га и Го́спода, благоволи́вшаго спасти́ род челове́ч от тли сме́ртный, Его́же досто́йно пою́ще, взыва́ем: благослове́н Бог оте́ц на́ших.

Ра́дуйся, Всепе́тая, пала́то одушевле́нная Царя́ Христа́; ра́дуйся, ста́мно, Яже Ма́нну во чре́ве Твое́м боже́ственне поноси́вшая, препита́ющую любо́вию зову́щих: благослове́н Бог оте́ц на́ших.

Неве́стник всенепоро́чен е́же па́че сло́ва Боже́ственнаго воплоще́ния, черто́г же и престо́л правому́дрствующе Тя имену́ем, и возвесели́вшеся, Рождеству́ Твоему́ пое́м: благослове́н Бог оте́ц на́ших.