Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси; вся бо твори́ши, Христе́, то́кмо е́же хоте́ти, Тя превозно́сим во вся ве́ки.

Яко Бо́га Человеколю́бца Ма́ти, человеколю́бно умилосе́рдися и ми́лостивным вонми́ о́ком, егда́ пло́ти душа́ моя́ разлуча́ется, да сла́влю Тя, Пресвята́я Богоро́дице.

Высо́кая Христа́ Влады́ки пала́то, Твою́ благода́ть с высоты́ посыла́ющи, предвари́ мя ны́не в день ну́жды моея́, да сла́влю Тя, Пресвята́я Богоро́дице.

Разбежа́тися ва́рваров безпло́тных полко́м и бе́здне возду́шней разве́рзтися, и к небеси́ взы́ти ми сподо́би, да сла́влю Тя, Пресвята́я Богоро́дице.

Яко Го́спода Вседержи́теля ро́ждшая, го́рькия мироде́ржца мытаренача́льники дале́че прогони, внегда́ скончава́тися ми, да сла́влю Тя, Чи́стая, во ве́ки.