Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: слава си́ле Твое́й, Го́споди.

Ра́дуйся, у́мная Ла́стовице и́стинно сладкоглаго́ливая, зи́му уста́вльшая мы́сленную, и к весне́ пресочта́вшая вся ве́рою Тя, Пречистая, велича́ющия.

Ра́дуйся, Влады́чице, та́инственная живопита́тельная трапе́зо, Хлеб небе́сный Христа́ посреде́ сея́ нося́щи, Нескве́рная, от Него́же прича́щшиися неизрече́нныя жи́зни и ра́дости исполня́ются.

Ра́дуйся, сокро́вище де́вства су́що и похвале́; ра́дуйся, Ка́мень жи́зни во чре́ве Твое́м едина вмести́вшая; ра́дуйся, Пречу́дная; ра́дуйся, па́дших наде́жное исправле́ние.

Ра́дуйся, ве́рных невла́емая тверды́не; ра́дуйся, неве́рных и лука́вых враго́в отмще́ние; ра́дуйся, Всечу́дная, Благослове́нная; ра́дуйся, всех Влады́чице.