Ирмос: Твоя́ песносло́вцы, Богоро́дице, живы́й и незави́стный исто́чниче, лик себе́ совоку́пльшия духо́вно утверди́, в Боже́ственней Твое́й сла́ве венце́в сла́вы сподо́би.

Победи́шася естества́ преде́лы и разреши́шася зако́ны есте́ственныя па́че ума́ рождество́м Твоим, Де́во Ма́ти Нескве́рная, из Тебе́ бо Беззра́чный плотско́е бытие́ восприя́т.

Нескве́рно Тя ло́же узре́ Соломо́н, Влады́чице, шестиюдесятми му́дрыми остолпля́емо, в не́мже Бог плоть прия́т возлегий, и к челове́ком бесе́дова.

Багряни́цу от честны́х крове́й Твоих Сло́во Бо́жие понесы́й без преложе́ния и смеше́ния, и Ада́мово обнаже́ние покры́вый, облече́ в Боже́ственную красоту́.

Нестерпи́маго Божества́ вмести́лище и град Бо́жий одушевле́н яви́лася еси́, Всенепо ро́чная, в не́мже вели́кая соде́яшася неизрече́ннаго ра́зума, я́же от ве́ка не слы́шана бе́ша.