Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Искуше́ний бу́ри находя́ще ми лю́тыя, души́ устраши́ша жили́ще, Отрокови́це, те́мже слезя́, к покро́ву Твоему́ прихожду́.

Помысло́в су́етных мя и душетле́нных изба́ви, Нескве́рная, помышле́ния же прия́ти суда́ и та́мошняго состоя́ния сподо́би.

Боже́ственнаго отпадо́х весе́лия, Ма́ти Бо́жия, и пла́кати начина́ю, окая́нный, а́ще ка́ко та́мошняго рыда́ния изба́влюся.

Исцеле́ний исто́чник стяжа́вше Тя, Влады́чице Чи́стая, неду́гующии жа́ждею прегреше́ний, притека́ем и спасе́ние прие́млем.

Седален, глас пятый. Подобен:Собезнача́льное Сло́во:

Многообра́зне, Де́во, Христа́ прогне́вах мы́слию и сло́вом, делесы́ и дея́ньми, и бою́ся стра́шнаго та́мо суди́ща, но предвари́вши ско́ро, изми́ мя лю́тых ма́терним Твоим моле́нием и к Бо́гу дерзнове́нием, моле́бника Твоего́, Богороди́тельнице.