Ирмос: Богоявле́ния Твоего́, Христе́, к нам ми́лостивно бы́вшаго, Иса́ия Свет ви́дев невече́рний, из но́щи у́треневав, взыва́ше: «Воскре́снут ме́ртвии, и воста́нут су́щии во гробе́х, и вси земноро́днии возра́дуются».

Ца́рствующих Царь и Госпо́дь госпо́дствующих, Де́во, из Тебе́ воплоти́выйся за благосты́ню, вто́рство Ти дарова́. Отону́дуже со вла́стию спаса́еши прибега́ющих к Боже́ственному Твоему́ кро́ву; и мене́ ны́не ми́лостию Твое́ю соблюди́.

Облак нестоя́тельных помысло́в, напа́д окая́ннеи́ души́ мое́й, возмуща́ет и обдержи́т мя, помрача́ет и оскорбля́ет, Всепе́тая, но Ро́ждшая Со́лнце Христа́, расто́ргни сие́ и ми́лостию Твое́ю мя соблюди́.

Сла́досте души́ моей и свобожде́ние лю́тых, Отрокови́це, неви́димо ны́не наше́дши, вся́каго озлобле́ния изба́ви, е́же ми мно́жество исхода́тайствова согреше́ний, и вся́ческаго вре́да вы́шша во ве́ки мя соблюди́.

Умерщвле́нный мой ум живоно́сным Твои́м и честны́м предста́тельством воздви́гни и просвети, и разу́мно наста́ви пе́ти Тебе́: Де́во, ро́ждшая Христа́, ипоста́сную Прему́дрость, ми́лостию Твое́ю мя соблюди́.