Ирмос: Безсе́меннаго зача́тия Рождество́ несказа́нное, Ма́тере безму́жныя нетле́нен Плод, Бо́жие бо Рожде́ние обновля́ет естества́. Те́мже Тя вси ро́ди, я́ко Богоневе́стную Ма́терь, правосла́вно велича́ем.

Но́ва мя сотвори́, грехми́ состаре́вшася, Богоро́дице, я́ко да реку́ Ти глас ра́достный со арха́нгелом: ра́дуйся, разреше́ние кля́твы и всех предста́тельство честву́ющих Тя, Всепе́тая.

Яже боже́ственне пре́лести пещь попра́вшая, ра́дуйся, Де́во, Еюже небе́сная земны́м свеселя́тся; ра́дуйся, затворе́нный Еде́м нам отве́рзшая; ра́дуйся, всея́ вселе́нныя ра́дование и похвало́.

Ты мою́ утоли́ искуше́ний бу́рю, Ты согреше́ний бе́здну изсуши́, ны́не обдержа́щих мя и ко глубине́ влеку́щих поги́бельней; ра́зве Тебе́ бо ино́го не и́мам, Блага́я, предста́тельства, все окая́нный аз.

Богоневе́сто Влады́чице, а́нгелов весе́лие и сла́во святы́х, с си́ми же молю́ ми́лость нам обрести́ и долго́в разреше́ние, и живота́ тече́ние до́бре сконча́ти, Боже́ственная творя́ще.

Стихиры, глас шестый. Подобны:Все отло́жше:

Ра́дуйся, Вседержи́теля Бо́га прия́телище; ра́дуйся, звездо́ незаходи́мая; ра́дуйся, Многоимени́тая; ра́дуйся, Всечестна́я, Яже Свет Ея ро́ждшая на земли́, Непоро́чная, и вся озари́вшая; ра́дуйся, пала́то одушевле́нная все́ми Владу́щаго; ра́дуйся, избавле́ние Евино и первозда́ннаго исправле́ние; ра́дуйся, Богоро́дице, ве́рных держа́во и покро́ве; ра́дуйся, челове́ков воззва́ние; ра́дуйся, Неискусобра́чная.

Ра́дуйся, Присноде́во, луно́ всесве́тлая, свет от Со́лнца прии́мшая, Тобо́ю просвеща́юща у́мно всю тварь и тьму изгоня́юща. Ра́дуйся, Яже жа́ра и пра́вды Верх, Ме́рила же и Льва, я́ко Де́выя зо́дий, Твоим хода́тайством сраствори́вшая нам[81], Всепе́тая, и гнев умягча́ющая Бога Вседержи́теля.

Ра́дуйся, удобрение, вся́ческия доброты превы́шшее; ра́дуйся, честны́й да́ре, почесть вся́ку превосходя́й, нестерпи́маго Божества́ всего прия́телище, спасение мое́, Всепетая, утешение и животе, свете мой, надеждо и сла́досте, дыха́ние и предста́тельство мое́, хода́тайство ти́хое и похвало, пе́ние и ра́дование, пи́ще моя́, просвеще́ние и Помощнице, святы́ня и све́тлость моя́, сла́во и посеще́ние.

Уста́ви, Всенепоро́чная, страстей моих истица́ния и струи́ возрази греха́ моего́, и то́ки похоте́й изсуши́, молю́ бо Тя, припа́даю и взыва́ю: сокруши́, Влады́чице, окамене́нное мое́ се́рдце, исто́чники умиле́ния и слез ту́чи ми подаю́щи, да и ру́це и все те́ло оскве́рншееся си́ми измы́вый, ми́лость Бо́жию привлеку́.