Ирмос: Бо́жиим све́том Твоим, Бли́же, у́тренюющих Ти души любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мрака грехо́внаго взыва́юща.

Добро́то Иа́ковля, пре́жде не́же всем бы́ти Богоизбра́нная, Святы́ня и Чисте́йшая, ра́дуйся, Влады́чице, несравне́нно обогати́вшися.

Проразуме́в издале́ча та́инственно богосве́тлый проро́ческии́ лик, Де́во Богоневе́сто, рождества́ Твоего́ неизрече́нную глубину́, о́бразы Тя свяще́нными проначерта́.

Пресвята́я, Яже Бо́га еди́на на земли́ я́ко вои́стинну Пресвята́го ро́ждшая, Тя Богоро́дицу при́сно пропове́дающия освяти́ и спаси́ хода́тайством Твоим.

Све́том Твоим Боже́ственным, я́ко Блага́я, ду́шу мою́, помраче́ну сластьми́, светонаста́ви и ко спасе́ния стези́ путево́ждствуй, еди́на Спа́са Христа́ Поро́ждшая.