Ирмос: Воистинну Богоро́дицу Тя испове́дуем, спасе́нии Тобо́ю, Де́во Чи́стая, с безпло́тными ли́ки Тя велича́юще.

Возвы́си рог Це́ркве и ве́рным на язы́ки кре́пость пода́ждь, и ца́рствия ски́птры, Чи́стая, утверди́.

Иноплеме́нных полки́, бра́ней хотя́щия, я́ко немощны́я, осла́бленныя же и побежде́нныя, Де́во Нескве́рная, ско́ро яви́.

Еди́но споборе́ние чту́щих Тя христиа́н правосла́вных, Твоими моли́твами, Богома́ти, ага́ряны вско́ре оружено́сныя постыди́.

Вразуми́, Де́во, ве́рных ли́ки, и на враги́ ви́димыя и неви́димыя благопоспе́шствовавши, спаси́ от вся́кия ско́рби.

Стихиры, глас осьмый. Подобны:О, пресла́внаго чудесе:

Ра́дуйся, огнезра́чная колесни́це; ра́дуйся, заре́ та́инственная, в ми́ре поро́ждшая све́тлое, незахо́димое и невече́рнее Со́лнце; ра́дуйся, червлени́це, порфи́ру от крове́й Твоих Всецарю́ омочи́вшая; ра́дуйся, Всенепоро́чная; ра́дуйся, всех ве́рных Храни́тельнице, призыва́ющих Тя упова́нием душе́вным.

Ра́дуйся, па́дших исправле́ние; ра́дуйся, а́лчущих пи́ще; ра́дуйся, бога́тство безбе́дное и ни́щих сокро́вище неистоща́емо; немощны́х, ра́дуйся, посеще́ние; скорбя́щих, ра́дуйся, утешение; ра́дуйся, по́моще призывающим Тя и ору́жие непобеди́мо, утверже́ние и стене́ неруши́мая.

Ра́дуйся, та́инственный раю́, дре́во жи́зни Христа́ во чре́ве Твое́м Нося́щая и Рождшая нетле́нно, во оживле́ние нас, дре́ва сне́дию иногда́ умерщвле́нных и сме́рти зле поко́ршихся; ра́дуйся, Всевожделе́нная и Всепа́мятная; ра́дуйся, челове́ком Боже́ственное весе́лие подаю́щая при́сно.

Спаси́ мя, Всесвята́я Влады́чице, Спа́са Христа́ неизрече́нно ро́ждшая; Тя бо еди́ну стяжа́х предста́тельство раб Твой, сте́ну же, кров и ра́дование, и души́ моея́ Боже́ственное утеше́ние; Ты у́бо изба́ви мя че́рвия неусыпа́юща и огня́ ве́чнующа, Ма́ти Христа́ Бо́га.