Ирмос: Воды древле, ма́нием Божественным, во едино сонмище совокупи́вый и раздели́вый море изра́ильтеским лю́дем, сей Бог наш, препросла́влен есть; Тому́ еди́ному пои́м, я́ко просла́вися.

Ра́дуйся, престо́ле Госпо́день; ра́дуйся, Де́во, разре́шшая пре́лести мглу и к Све́ту Невече́рнему вся привле́кшая; ра́дуйся, Неискусобра́чная; ра́дуйся, богопи́санный сви́тче, ве́рных утвержде́ние; ра́дуйся, Всепе́тая.

Ра́дуйся, ста́мно, Ма́нну внутрь нося́щая и всех услажда́ющая и́стинную Влады́чицу ве́рою испове́дающих Тя; ра́дуйся, всея́ тва́ри Упра́вителя Ро́ждшая; ра́дуйся, свет озари́вшая ми́ру, Пречи́стая.

Многорачи́тельная добро́то и всечестна́я, ра́дуйся, вся па́че естества́ Твоим рождество́м из глубины́ неве́рия спа́сшая и к ве́ре Боже́ственней руково́дствовавшая; ра́дуйся, еди́на Преблагослове́нная; ра́дуйся, Богоневе́сто.

Светоприе́мная Де́во, ра́дуйся, еди́на ро́ждшая Спа́са ми́ру и всех злополу́чных наде́ждо; ра́дуйся, Жизнепода́тельнице; ра́дуйся, Нескве́рная, Всесвята́я; ра́дуйся, присноживо́тныя струи́ источа́ющая.