Ирмос: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоносный глубины́ возведи́ мя.

Бесе́ды и словеса́ всех ве́рных Тя благохва́лят, я́ко весь долг челове́ч рождество́м Твоим Я́ве отда́вшую; но и ны́не певца́ Твоего́ приими́, и от вся́ких напа́стей и бед изба́ви.

Боле́знующа мя, и те́рнием страсте́й и согреше́ний стрека́ема, и и́щуща е́же от Тебе́ исцеле́ния, вся́кия боле́зни и печа́ли изба́ви, Всенепоро́чная, искуше́ний же изми́ и скорбе́й.

Земноро́дных естество́ на не́бо, Богоро́дице, яве возвела́ еси́, Царя́ Сла́вы бы́вши пала́та; сего́ ра́ди мя из глубины́ мно́гих грехо́в, искуше́ний же и страсте́й возведи́.

Вопло́щшееся Сло́во па́че ума́ и словесе́, Де́во Чи́стая, сло́вом породила́ еси́, безслове́сия нас изба́вльшее; сего́ ра́ди Боже́ственными словесы́ непреста́нно Тя песносло́вим и ве́рно сла́вим.

Седален, глас седьмый.Самогласен

Богоро́дице Де́во Нескве́рная, Сы́на Твоего́ с вы́шними си́лами моли́ согреше́ний проще́нию ми пре́жде конца́ дарова́тися, ве́рно Тя сла́вящу.