Ирмос: Из утро́бы Ио́ну младе́нца изблева́ морски́й зверь, якова́ прия́т; в Де́ву же все́льшееся Сло́во, и плоть приемшее, про́йде сохра́ншее нетленну; егоже бо не пострада́ нетле́ния, Рождшую сохрани неврежде́нну.

Радуйся, источниче светозарный и неистоща́емый, от него́же све́тлая и чисте́йшая и присноживо́тная вре́ющи вода́ напоя́ет жа́ждущия и ороша́ет пла́менем прегреше́ний дре́вле держи́мыя, и в Боже́ственную вво́дит отра́ду, Влады́чице.

Ра́дуйся, реко́ Бо́жия неисчерпа́емая, вод мно́гих вои́стинну испо́лнена, е́юже вся ороша́ется тварь, воспева́ющи Тя, и веселя́тся се́рдцем вси пла́менем держи́мии и жа́ждущии́ воскресе́ния то́ков.

Свет ми све́тлый, пала́то Влады́чня, бу́ди, во мно́жество впа́дшу лютых и спя́щу вся́ко при бла́те неве́дения, и Твоея́ и́щущу Боже́ственныя по́мощи. Ра́зве Тебе́ ино́го не стяжа́х заступле́ния раб Твой, Влады́чице.

Но́вое Не́бо показа́ся светле́йшее: возсия́ла бо еси́ па́че сло́ва и мы́сли Со́лнце вели́ко и незаходи́мо, безбо́жия нощь, Всесвята́я, разре́шши. Те́мже тварь вся веселится и ра́дуется, и е́же «ра́дуйся» непреста́нно Ти вопие́т.

Седален, глас первый. Подобне:Гроб Твой, Спа́се:

Де́ва воистинну пре́жде рождества́, Де́во, Де́ва вои́стинну и в рождестве́ еси́; Де́ва Присноде́вственная и по рождестве́ пребыла́ еси́, и Де́ву Тя испове́дуем, Де́во, и упова́ем Тобо́ю, Де́во, спасти́ся, де́вственных похвало́.