Ирмос: Непло́дствовавшии́ мой ум, плодоно́сен, Бо́же, покажи́ ми, Де́лателю до́брых, Насади́телю благи́х, благоутро́бием Твоим.

Кто восхваля́ти Тя от земноро́дных дово́лен по достоя́нию, Матероде́во? Ты бо в жена́х еди́на яви́лася еси́ избра́нна и всеблаже́нна.

Не́бо Тя воспева́ет и земля́ благохва́лит, с ни́миже и аз, Тебе́ до́лжная воздая́й, зане́же яви́лася еси́ ми спаси́тельна, Богороди́тельнице.

Упова́нием е́же на Тя искуше́ний изба́влен есмь, к Тебе́ взыва́ю из глубины́ души́: Ты мой покро́в держа́вный еси́, Богора́дованная.

Содержи́ма мя в лю́тых и е́же жи́ти отча́янна поми́ловала еси́, челове́ков наде́ждо, изыма́ющи злых манове́ньми Твоими, Влады́чице.