Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твоих исте́кшею кро́вию.

Черто́г просла́влен, сла́вная Влады́чице, Царя́ Сла́вы бы́вши, челове́ки просла́вила еси́, те́мже сла́вы нетле́нныя и мене́ удосто́й.

Уста́вила еси́ тле́ние естества́ неизбе́жное нетле́нием неруши́мым; но уста́ви, Нескве́рная, и страсте́й моих то́ки, и плотска́го мудрова́ния струи́.

Умертви́ двиза́ния стра́стная телесе́ и игра́ющую мою́ плоть уму́ покори́, я́ко жребя́ обуздава́ющи, Чи́стая, реме́ньми Твоих моли́тв.

Зако́нов кроме́, Всенепоро́чная, родила́ еси́ Законополо́жника исти́нна, Его́же моли́ ду́шу мою́, зако́ну греха́ поко́ршуюся, уще́дрити и спасти́ мя.

Седален, глас четвертый. Подобен:Вознесы́йся:

Яже от земли́ к небеси́ просте́рта, Ле́ствица невеще́ственная та́йно прообража́ше слове́сную и одушевле́нную Тя ле́ствицу: Ты бо средосте́ние граде́жа разо́рши, Всепе́тая, пре́жде разстоя́щаяся соедини́ла еси́, не́бо совоку́пльши земли́ и челове́ки смеси́вши а́нгелом.