Ирмос: Впещь о́гненную вве́ржени преподо́бнии о́троцы, огнь в ро́су преложи́ша, воспева́нием си́це вопию́ще: «Благослове́н еси́, Го́споди Бо́же оте́ц на́ших».

Ра́дуйся, кра́сная Царе́ва пала́то; ра́дуйся, Чи́стая, Помо́щнице сладкопою́щим: благослове́н еси́ во ве́ки, Го́споди Бо́же оте́ц на́ших.

Ра́дуйся, тве́рдый благоче́стия сто́лпе; ра́дуйся, исправле́ние ве́рою взыва́ющих: благослове́н еси́ во ве́ки, Го́споди Бо́же оте́ц на́ших.

Ра́дуйся, светле́йшаго све́та блиста́ние, ра́дость и весе́лие любо́вию пою́щих: благослове́н еси́ во ве́ки, Го́споди Бо́же оте́ц на́ших.

Возста́ви мя, в бе́здну напа́стей впа́дшаго, пода́ждь ру́ку, Влады́чице, моле́бнику Твоему́, вопию́щу: благослове́н еси́ во ве́ки, Го́споди Бо́же оте́ц на́ших.

песнь 8

Ирмос: Еди́наго Безнача́льнаго Царя́ Сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

Небе́сных чино́в Святе́йшую ве́рнии Тя разуме́юще, Тебе́, Всепе́тая, вопие́м: ра́дуйся, ми́ра покро́ве, пала́то злата́я всех Царя́; ра́дуйся, Благослове́нная.

Яко вои́стинну неизрече́нна зело́ и стра́нна суть челове́ком и а́нгелом вся стра́шнаго младоноше́ния Твоего́, Де́во Нескве́рная.

Ины́я не стяжа́х по́мощи в ну́ждах, гото́вейшия в беда́х Изба́вительницы и изве́стныя Засту́пницы, в неду́зех Целе́бницы, радости и веселия в скорбех различных, Всенепорочная.

Вжили́, Чистая, силу души моея́, многими умерщвленную грехи, и просвети покаяния светом Божественными Твоими прошении, яко да сла́влю Тя во веки.