Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную песнь пою́ща.

Коле́но Тебе́ преклоня́ю, Влады́чице, окая́нный, и Твоего́ ны́не прошу́ Боже́ственнаго предста́тельства: разреши́ печа́ль души́, разори́ о́блаки уны́ния моего́ моле́ньми Твоими, оскорбля́емых утеше́ние.

От скве́рных страсте́й све́тлость души́ моея́, Богоро́дице Де́во, соблюда́ющи неприме́сну, чи́сто мя, Нескве́рная, сотвори́ Свет Боже́ственный зре́ти, Тебе́ сла́вяща.

Ты воста́ния я́же на ны вра́жия держа́вною Твое́ю си́лою, Влады́чице, пременя́ющи, мир глубо́к ста́ду Твоему́ да́руй, я́ко Божественного ми́ра Хода́таица.

Созда́вый на еди́не Бог сердца́ челове́ков, боле́зни ве́дый и стра́сти душ на́ших, сообра́зное Тя подаде́ врачевство́ нам, Нескве́рная, в боле́знех и ско́рбех.