Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Боже́ственный Дави́д, пра́отец Твой, рече́т: «Пресла́вная глаго́лашеся о Тебе́, Бо́жий одушевле́нный гра́де, сла́вою обогати́ла его́ еси́», провозвеща́я: «Ра́дуйся, сла́вы уде́ле, Еюже просла́вися Царь Сла́вы!»

Неду́гующа душе́ю и те́лом от невнима́ния, Богома́ти, ми́лостию Твое́ю ны́не воздви́гни от одра́, я́ко да ве́рою всегда́ вопию́ Ти: ра́дуйся, сла́вы уде́ле, Еюже просла́вися Царь Сла́вы.

Еди́ну на Тя спасе́ния моего́, Де́во, наде́жду возложи́х, и Тобо́ю изба́витися ча́ю печа́ли и озлобле́ния, я́ко да пою́: ра́дуйся, сла́вы уде́ле, Еюже просла́вися Царь Сла́вы.

Возразя́, Пречи́стая Де́во, злы́я враго́в нахо́ды Твое́ю си́лою, при́сно ми па́кости де́ющих завистию льстивомудраго, да пою: ра́дуйся, сла́вы уде́ле, Еюже просла́вися Царь Сла́вы.