Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ нам; но не преда́ждь нас до конца́, отце́в Бо́же.

Согреши́хом, беззако́нновахом, преогорчи́хом Христа́, вся́кое зло́е соверши́хом дея́ние, на гнев Его́ подвиза́юще; но Ты, Де́во, Сего́ милостива соде́лай нам осужде́нным.

Помышле́ньми, чу́вствами же и дея́ньми, Богоро́дице, весь от Бо́га Жива́го отступи́х, и мучи́телем порабо́тихся, страсте́й обрета́телем, но Ты изба́ви от сих и покая́ния зарю́ по да́ждь ми.

Егда́ душа́ моя́ окая́нная е́же от телесе́ терпе́ти разлуче́ние и́мать, и несть избавля́яй или́ утеша́яй, тогда́ предста́ни, Влады́чице, и де́монскаго изми́ мя стремле́ния.

Лицеме́рство Влады́ка мой ве́лие зло в житии́ нарече́; его́же де́лания льсти́ва, Богоневе́стная, Твое́ю изба́влюся кре́постию, да не мече́м ду́ха расте́шет мя Христо́с.