Ирмос: Нестерпи́мому огню соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Воздухохо́дное о́блако, на него́же Бог Сло́во на о́блацех е́здяй возше́д, я́ко на о́блаце ле́гце седя́й, низложи́л есть еги́петския дре́вле куми́ры, сокруши́, Де́во, страсте́й моих столпы́.

Боже́ственная клеще́, Угль Боже́ствен неизрече́нно прие́мшая, страсте́й моих разжже́нная у́глия угаси́, Всесвята́я, росо́ю Твоих моли́тв, да сла́влю Тя во вся ве́ки.

Неве́стника кра́сна святы́х и небоплете́ннаго мя сподо́би черто́га, неве́стниче сла́вы

Бо́жия, безстра́стия одея́нием све́тлым оде́явши, Богома́ти, и ри́зою обо́лкши нетле́ния.

Нощь мя несве́тлая объе́млет, Отрокови́це, дело́м бо тьмы порабо́тихся, но Сама́ мя све́том Твоим озари́, и просвети́ пою́ща: благослови́те, вся дела́ Госпо́дня, Го́спода, и превозноси́те во вся ве́ки.