Ирмос: Его́же ужаса́ются а́нгели и вся во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся ве́ки.

Ка́ко пребыва́вши безпеча́льна, окая́нная душе́, ка́ко забве́нию предала́ еси́ дела́ сту́дная? Разгни́ сия́ Ма́тери Бо́жии, да хода́тайствует к Рожде́нному от Нея́.

Подо́бен бых и́же дре́вле Исма́илу, досажда́яй себе́ я́ко друго́му Исаа́кови, сего́ ра́ди от до́ма изгоня́юся Авраа́мля, го́рняго уде́ла.

Отчужди́вый себе́ небе́снаго оте́чествия, в чужды́я приидо́х гра́жданы и разбо́йники, яды́й бра́шно чужде́е стад свины́х; Ты у́бо, Богоро́дице, я́ко блу́днаго мя спаси́.

Чистоты́ разори́х печа́ти безсту́дно; чистоты́ ро́ждши Христа́ Насади́теля, чи́сте жи́ти про́чее вре́мя живота́ моего́ сотвори́, Богома́ти.