Ирмос: Оподо́бии зла́те небре́гше треблаже́ннии юноши, неизме́нный и живы́й Бо́жий о́браз ви́девше, среди́ огня́ воспева́ху: «Осуществова́нная да пое́т Го́спода вся тварь и превозно́сит во вся ве́ки».

Вод живо́тных струя́ми пла́менем греха́ иста́явшее се́рдце мое́ напо́й, Богоро́дице, в умиле́нии мя всегда́ соблюда́ющая, ве́рою сладкопою́ща: да пое́т Го́спода вся тварь и превозно́сит во вся ве́ки.

Нескве́рная Агнице, браконеиску́сная и нетле́нная Де́во Богоневе́сто, Юнице кра́сная, Яже Тельца́ упита́нна безму́жно роди́вшая, облегчи́, возми́ от ду́ши моея́ тя́жкую цепь и яре́м грехо́вный.

Ски́ние богоде́ланная, Свята́я су́щи святы́х, показа́вшаго дре́вле ски́нии о́браз Архиере́я Вели́ка иму́щая внутрь, се́рдце мое́, Богоро́дице, покажи́ ски́нию свя́ту Вы́шняго Всецаря́ Христа́.

Отсече́ся от утро́бы Твоея́, Влады́чице, я́ко от горы́, Ка́мень честны́й, и столп вся́кия пре́лести, я́ко Вседержи́тель, еди́н Всеси́лен сокруши́л есть; тем ны́не, Всенепоро́чная, о́бразы страсте́й души́ моея́ потреби́, мы́сленных враг сокруша́ющи члено́вная[28].