Ирмос: Впещь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Но́вый рай яви́лася нам еси́, Богоро́дице Всесвята́я, не сме́рти дре́во, но Сад живота́ безсе́менно израсти́вши Го́спода, Его́же безсме́ртныя жи́зни вси наслажда́емся.

Никто́же поги́бе, Чи́стая, и́же ве́ры упова́ние стяжа́вый на Тя правосла́вно, Богома́ти Мари́е, еди́ни же за́вистию отме́щущиися Твоего́ не покланя́тися о́браза начерта́нию.

Услажда́ется Це́рковь Христо́ва вся, Богоро́дице, Твоим рождество́м, я́ко спаса́ются гре́шнии вси и ни́щии, любо́вию к Тебе́ прибега́юще: прии́де бо Бог Тобо́ю челове́ки спасти́.

Свобожда́ется Тобо́ю прама́терь, Богоро́дице, осужде́ния, и се ны́не жены́ страда́льчествуют за Христа́, и ра́дуется естество́ же́нское, я́ко извеща́ет де́лом первому́ченица Фе́кла.