Ирмос: Всяк земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Ра́дуйся, Мари́е Богоневе́сто, ми́ра Засту́пнице; ра́дуйся, звездо́ незаходи́мая, Све́та прия́телище, Тро́ицы до́ме; ра́дуйся, Сло́ва жили́ще и всех утвержде́ние вопию́щих: ра́дуйся, Всеблаже́нная Богоро́дице, Чи́стая Присноде́во.

Ра́дуйся, златоза́рный све́щниче и трапе́зо, ве́рных пита́ющая; ра́дуйся, невозде́ланная земле́, живоно́сный израсти́вшая Клас; ра́дуйся, исто́чниче, во́ду вре́яй естественноживо́тную вопию́щим: ра́дуйся, Всеблаже́нная Богоро́дице, Чи́стая Присноде́во.

Ра́дуйся, черте́же, в не́мже уневе́сти Бог естество́ на́ше; ра́дуйся, многопло́дная ма́слино, вся обвеселя́ющая; ра́дуйся, купе́ле очище́ния Боже́ственнаго неоску́дная вопию́щим: ра́дуйся, Всеблаже́нная Богоро́дице, Чи́стая Присноде́во.

Ра́дуйся, червлени́це у́мная, обагри́вшая порфи́ру Бо́жию; ра́дуйся, многоце́нное ми́ро, ве́рныя облагоуха́ющее; ра́дуйся, стене́ неразори́мая и прибе́жище вопиющих: ра́дуйся, Всеблаже́нная Богоро́дице, Чи́стая Присноде́во.

Стихиры, глас четвертый. Подобны:Дал еси́ зна́мение:

Ра́дуйся, держа́внеи́шее ми́ра всего́ спасе́ние, стоя́щих утвержде́ние и па́дших воста́ние; ра́дуйся, бога́тство нище́тствующих, убо́гих сокро́вище, пи́ще а́лчущих; ра́дуйся, Всенепоро́чная, утеше́ние ско́рбных и немощны́х посеще́ние; ра́дуйся, едина помоще верно молящих Ти ся.

Ра́дуйся, светле́йшее у́тро, ве́рным возсия́вшая невече́рнее Со́лнце; ра́дуйся, глубино́ неизме́рная и высото́ неизрече́нная стра́шнаго та́инства; ра́дуйся, а́нгелов весе́лие; ра́дуйся, пла́мень пре́лести Угаси́вшая а́дов; ра́дуйся, всесве́тлый о́блаче, Ада́мово исправле́ние; ра́дуйся, Всечестна́я Влады́чице.

Ра́дуйся, удобре́ние де́вствующих и похвале́ вселе́нныя; ра́дуйся, ка́меню адама́нтск, его́же прови́де Амо́с проро́к и не мимохо́дит Бог, Твоими моле́нии призыва́емь; ра́дуйся, ми́рови избавле́ние; ра́дуйся, Божества хра́ме; ра́дуйся, ве́рных язы́ку услажде́ние, Нескве́рная.

Со́лнце Ро́ждшая пра́вды, мрак расто́ргни оскорбля́ющих мя страсте́й, и зми́я, ду́шу мою́ прельща́юща и при́сно ю́ любосла́стии и суе́тствы обава́юща, дале́че отжени́ от окая́ннаго моего́ се́рдца, в безстра́стия тишине́ соблюда́ющи раба́ Твоего́.