Ирмос: Глас глаго́л моле́бных от боле́зненныя, Влады́ко, души́ услы́шав, от лю́тых мя изба́ви: еди́н бо еси́ на́шего спасе́ния вино́вен.

При́зри на проше́ния «ра́дуйся» Ти вопию́щих, мо́сте Боже́ственный, и́мже прехо́дит спаса́емых мно́жество, Всечестна́я, к богоразу́мию.

Дре́во живота́, ра́дуйся, процве́тшая мы́сленное, Влады́чице, от него́же яду́ще не умира́ем вои́стинну и кля́твы пра́отчей, Нескве́рная, избавля́емся.

Простри́ ру́це е́же «ра́дуйся» Ти вопию́щим, Всечи́стая, при́сно, и вся́каго ны изми́ озлобле́ния и стра́шныя му́ки.

Пою́щия «ра́дуйся» держа́ве Твое́й от вся́кия изба́ви напа́сти, и ми́ра, я́ко Ро́ждшая Бо́га ми́ра, испо́лни.

Седален, глас вторый. Ποдобен:Милосе́рдия су́щи:

Кто ви́де, кто слы́ша Ма́терь, ражда́ющую Зижди́теля Своего́, пи́щу даю́ща вся́кой пло́ти? О, чудесе́! Престо́л херуви́мск яви́ся утро́ба Твоя́, Благода́тная; моли́ся о душа́х на́ших.