Ирмос: Вознесе́на Тя ви́девши Це́рковь на кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

От ю́ности моея́, Пречи́стая, окаля́хся, Богороди́тельнице, сластьми́, но пра́вды Со́лнце поро́ждши Христа́, ны́не све́том Твоим просвети́ очерне́вшее мое́ се́рдце.

Врачевство́ све́тлое су́щи, просвети́ мой ум, светоно́сное Сло́ва жили́ще, и тьмы изми́, Всепе́тая Светороди́тельнице, в невеще́ственный све́т вселя́ющи мя.

Всеобра́зне зло́бе порабо́тихся, но к Тебе́ прибега́ю ны́не омраче́н: просвети́ мя, Све́та врата́, и изба́ви гее́нны, и невеще́ственна све́та испо́лни.

Законополо́жника ро́ждши и Светода́вца, го́рькую тьму ума́ моего́ разгони́ све́том моле́ний Твоих, и спаси́ мя, Влады́чице, оскверне́нна, Нескве́рная.